post

Folga en Renfe

O VENRES 30 DE AGOSTO e o DOMINGO 1 de SETEMBRO, o persoal do Grupo RENFE está convidado a participar nos paros ferroviarios que de 12:00 a 16:00 hs e de 20:00 hs a 24:00 hs están convocados contra a falla de cadro de persoal, pola paralizacións das externalizacións e a mellora do
servizo público ferroviario.
Dende que CGT remitiu o pasado 5 de Agosto unha carta o Ministerio de Fomento, solicitando a súa intervención no conflito, NIN O MINISTERIO NIN A PROPIA EMPRESA DERON SEÑAIS DE VIDA,
bloqueando calquera negociación que propiciara chegar a un acordo e evitar as folgas, nun claro exercicio de irresponsabilidade política e empresarial.
CGT está a loitar pra se aumente a un 108% a reposición de persoal en Renfe, que permita o rexuvenecemento do persoal, medida contemplada na Lei de Orzamentos Xerais do Estado e que nin RENFE nin Fomento quere cumprir, ademais da paralización das privatizacións e a mellora da conciliación da vida familiar e laboral, incluídas na Lei 6/2018 do pasado ano e que lonxe de negociarse eliminouse de facto pola imposición pola Dirección de RENFE.
A situación do cadro de persoal está a repercutir no servizo público que RENFE ten que ofertar a cidadanía e que en Galiza se concreta, como xa denunciamos en anteriores Notas de Prensa:
CONDUCIÓN: No ano 2018 mais de 100 trens en Galiza foron substituídos por autobuses por non ter maquinistas pra conducilos, ocasionando serios trastornos as viaxeiras.
INTERVENCIÓN: Mais de 5.200 trens de Media Distancia de Galiza circularon en 2018 sen persoal de Intervención a bordo que atendera e informara as viaxeiras. Estamos a falar de trens con unha capacidade
de 180 prazas que só circularon co maquinista, perdendo a empresa una importante cantidade de cartos por non poder vender billetes dentro dos trens, ademais de non atender adecuadamente as incidencias que se produciron. No primer semestre de 2019 circularon preto de 2480 trens de MD con só o maquinista a bordo.
VENDA DE BILLETES: Nas billeteiras de venda das estacións, son cada vez menos as xanelas abertas, recortando RENFE os horarios de venda anticipada en estacións como Compostela, Coruña, Vilagarcía, Pontevedra, Vigo-Guixar, etc., por non poder atender o fluxo de viaxeiros existentes, pola falta de cadro de persoal que imposibilita cubrir todas as quendas de traballo, o que produce longas ringleiras que repercute na calidade do servizo prestado.
MANTEMENTO DE TRENS: Cada vez mais traballos de mantemento dos vehículos de RENFE son desviados a empresas privadas por non contar RENFE con persoal suficiente pra facer o traballo. Esta falta de mantemento estase a notar no aumento das incidencias nos equipos de climatización, avarías de locomotoras, redución de prestacións de confort e tracción, que provocan retrasos e supresión de trens.
No mes de Agosto os trens Galiza-Barcelona e Galiza-Euzkadi sufriron retrasos e transbordos por incidencias nas súas locomotoras, por deficiente mantemento.
ADMINISTRACIÓN E XESTIÓN: O persoal de oficinas ve como cada vez aumenta a Xefatura posta a dedo e mingua o persoal administrativo sen posibilidades de promoción, saturándose sobre maneira os postos de traballo.
É principio e deber de calquera Sindicato defender, ata onde a razón esixe, os dereitos laborais dos seus representade@s; polo que CGT vai canalizar todo o enfado e a rabia d@s traballadores/ as e enfrontalos á tozudez da Dirección e o Ministerio que prefiren marchar de vacacións que negociar unha saída o conflito.
Con estes paros, CGT busca un aumento dunhas taxas de reposición de persoal que conduzan a mellorar os servizos que prestamos á cidadanía, garantindo a prestación duns servizos de calidade e garantes dun
ferrocarril social pra a maioría de cidadáns.
Galiza a 29 de Agosto de 2019

 

post

Folgas ferroviarias en Renfe Galicia

Unha vez que os Ministerios de Facenda e Fomento aproban taxas de reposición ridículas que non solucionan os problemas estruturais do Grupo Renfe e a empresa mantén unha actitude de intransixencia, @s traballador@s só quédanos un camiño, a mobilización.

É principio e deber de calquera Sindicato defender, ata onde a razón esixe, os dereitos laborais dos seus representade@s; polo que CGT vai canalizar todo o enfado e a rabia d@s traballadores/as e enfrontalos á tozudez da Dirección e o Ministerio convocando paros ao longo do período estival.

CGT convocou paros nas seguintes datas e horarios:

Día 31 de JULIO, de 12:00 a 16:00 horas e de 20:00 a 24:00.

Día 14 de AGOSTO, de 12:00 a 16:00 horas e de 20:00 a 24:00.

Día 30 de AGOSTO, de 12:00 a 16:00 horas e de 20:00 a 24:00.

Día 1 de SETEMBRO, de 12:00 a 16:00 horas e de 20:00 a 24:00.

Con estes paros, CGT busca un aumento dunhas taxas de reposición de plantilla que conduzan :

  • Mellora dos servizos que prestamos á cidadanía, atendendo a que cada día aumentan as incidencias nos servizos ferroviarios, como avarías do Aire Acondicionado en trens de Longa Distancia, retrasos por falla de vehículos ferroviarios ou falla de maquinistas, con trasnbordos a autobuses, etc.

Así mesmo aumentan os trens que circulan sen Interventor por falta de persoal. En 2018 circularon en Galiza 5.200 trens de Media Distancia sen persoal de comercial abordo, a maioría entre Coruña e Vigo e no primeiro semestre de 2019 xa circularon 2.480 mantendose a tendencia.

  • Cada día mais cargas de traballo se están desviando as empresas privadas, dende a venda de billetes (Guillarei, O Barco, A Rúa, Ribadavia, Sarria, O Carballiño) ata a reparación de trens na Base de Mantemento de Redondela, pasando pola venda de billetes en trens como na liña Ferrol-Ribadeo onde subcontrataron a Logirail para facer estes traballos propios de RENFE.

Serían moitos os exemplos que inciden nas extensas carencias producidas pola falta de cadro de persoal e as taxas de reposición máis que insuficientes, que non son capaces de manter e garantir a prestación duns servizos de calidade e garantes dun ferrocarril para a mayoría de cidadáns.

Derivado desta falta de persoal, chegouse á imposibilidade de cumprir o espírito do Real Decreto 6/2018 que é o aumento de emprego e a conciliación familiar polo que se tería que reducir a xornada laboral semanal a 37.5 h. porque de maneira unilateral, Renfe impuxo unha redución de xornada con 17 minutos diarios de reaxuste e dous días ao ano que máis do 80% do persoal non poderá gozar nas datas que sinalaron.

Sector Ferroviario da CGT de Galicia

 

8 DE MARZO, FOLGA XERAL FEMINISTA

A desigualdade e a discriminación son lacras que podemos observar en todos os ámbitos da vida, pero se manifestan no caso das mulleres dun xeito especialmente inicuo. A violencia machista, a relegación laboral, a xerarquización social que coloca a gran maioría das mulleres nun segundo plano con respecto aos homes son feitos incompatibles coa xustiza e a consecución dunha sociedade xusta e igualitaria. Deixar fóra á metade da poboación da aspiración a esta nova sociedade non só é repugnantemente inxusto, senón que fará imposible unha sociedade como a que queremos.

Esta situación de desigualdade e discriminación dáse tamén nas empresas e para combatela a arma que ten a clase obreira é a Folga Xeral. Por iso, e para enfrontar esta situación, a CGT convoca Folga Xeral de 24 horas o próximo 8 de marzo, Día Internacional da Muller Traballadora, en resposta solidaria ao chamamento feito polo o feminismo internacional.

Read More

 

O día 1 de decembro imos a Touro

Galiza está ferida por culpa dun sistema depredador que leva por diante todo o que atopa para encher os petos dos de sempre. Un sistema cruel ao que non lle importa facer dano se con iso consigue satisfacer a cobiza dos que máis teñen. Un sistema que conta coa submisión do poder político, cómplice necesario en toda esta desfeita. Os atentados ao noso país son constantes e veñen xa de lonxe, de moi lonxe, xa desde antes do desecamento da Lagoa de Antela ou da instalación da Celulosa na Ría de Pontevedra. As coiteladas á nosa terra foron, e son, unha constante, e aquí estamos para dicir basta.

Trouxeron unha minería destrutiva que contaminou terra, ríos e rías, e agora pretenden volver traer máis minas para acabar de destruír o que quede. As mesmas empresas que esnaquizan rexións enteiras de Canadá e EEUU coa extracción das Areas Bituminosas e co fracking, queren vir a Galicia a extraer todo o que queiran sen que a Xunta de Galicia teña intención de impedilo e co goberno central ollando para outro lado. Ben o saben aquí en Touro.

Construíron unha celulosa e unha fábrica de cloro na Ría de Pontevedra provocando grandes emisións de nitróxeno e óxido sulfúrico á atmosfera, e de fósforo, cobre, mercurio e zinc á ría e converténdose nunha das industrias máis contaminantes de Galicia, e como iso non abondou, encheron os montes de eucaliptos para satisfacer as súas demandas coa complicidade da Xunta de Galicia e a indiferenza do goberno central. E iso vai ser así moitos anos máis tras a prórroga da súa concesión. E nós dicimos que xa abonda.

Fixeron unha política forestal nefasta para o país que incide no abandono do rural e provoca terribles lumes forestais ano tras ano, moitos deles en parques naturais de gran valor como o Xurés, Invernadeiro ou o Caurel, por non falar dos recentes incendios en Mondariz ou os do ano pasado, que deixaron catro persoas mortas e innumerables danos materiais e ambientais. E para combater o lume, temos bombeiros forestais precarizados que tamén levan anos loitando polos seus dereitos mentres Feijoó fai fotos apagando lumes cunha mangueira. Lumes nunca máis!

Encheron de centrais eléctricas os nosos ríos, esnaquizaron cascadas e prexudicaron a salmóns, troitas e outros animais, puxeron centrais térmicas que encheron a nosa terra de choiva ácida e cóbrannos a electricidade a prezo de ouro, coma se os recursos foran seus, coma se o franquista Villar Mir fora o dono dos nosos ríos. E a pesar de todo isto nin sequera foron quen de dar unha solución á enerxía no peche de Alcoa. Estáfannos e dicimos que chove, pero xa chegou, non podemos permitilo, temos que paralos.

Todo isto é froito das políticas ao servizo do poder económico e de costas á xente, a nós. E se non nos mobilizamos firme e permanentemente, non imos poder darlle a volta a esta desfeita. Aquí, na loita desde abaixo, unitaria, constante e diversa, poderemos paralos. Por iso estamos aquí, para iso son as Marchas da Dignidade, para sumar forzas contra un inimigo que cada vez ten máis poder porque nós estámolo permitindo. Temos que loitar contra o inimigo común que nos está asoballando, que está desfacendo a nosa terra, os nosos dereitos e as nosas vidas. As Marchas seguiremos loitando para que isto non aconteza e berrando polo pan, traballo, teito e dignidade.

 

post

Caos en Correos

A CGT Correos de Galicia denuncia o caos creado pola posta en marcha das novas bolsas de contratación en Correos.

Correos abriu as bolsas no mes de Outubro pero non as puxo en marcha até o 1 de xuño, o que fixo que coincidira a entrada de numeroso persoal sen formación e sen experiencia previa coas vacacións do persoal habitual, o que, unido à falta de contratación por mor dos recortes, fai que as incidencias sexan numerosas.

Desde a CGT queremos denunciar as numerosas incidencias creadas no reparto postal durante este periodo estival.

Estamos a recibir numerosas queixas desde unidades de todo o territorio Galego desde o persoal que non son quen de repartir diariamente a correspondencia recibida, o que afecta negativamente ao dereito da cidadanía de recibir o correo diariamente.

O persoal, por medio dos/as seus/súas representantes sindicais fai responsable disto á falta de previsión da dirección.

A CGT indica que as problemáticas veñen dadas por dous motivos:

Por unha banda no mes de outubro de 2017 Correos convocou un proceso para crear unhas bolsas de contratación eventual. Ese proceso, moi criticado pola CGT polo seu retraso e polas súas irregularidades, deixou fora a centos de persoas que contaban cunha grande experiencia no traballo postal, valorando os méritos das devanditas bolsas dunha maneira totalmente cuestionable como, por exemplo, igualando a puntuaciuó dun cursos de “excel” de unhas horas a varios anos de experiencia no reparto.

Este feito fixo que numerosas persoas con experiencia quedaran sen a posibilidade de acceso ao traballo postal.

Por outra banda encontrámonos coa falta de contratación de Correos, que pretende levar a cabo o servizo –nos meses estivais- cun número de persoal a todas luces insuficiente que ronda o 40% menos do plantel oficial habitual. Correos indica, ademais, ao persoal de reparto que leven a maoriores outras zonas non habituais, o que chamamos “recargo”, feito que dificulta e entorpece o traballo e fai que sexa frecuente que queden zonas sen repartir.

A CGT quere denunciar publicamente que estes feitos levan inexorablemente a unha diminución intolerable da calidade no servizo postal, e esixen a Correos:

  • A substitución inmediata de todas as persoas que se encontran de vacacións
  • A ampliación das bolsas de contratación, recuperando a todas as persoas con experiencia no traballo postal

Todo o anterior baseado na querencia do noso sindicato CGT de velar polo estricto cumprimento do dereito a ter un servizo postal público de calidade.

CGT de Correos Galicia

 

post

COMUNICADO ANTE A MOBILIZACIÓN CONVOCADA PARA A CIG O 19 DE XUÑO

Os sindicatos abaixo asinantes facemos pública a nosa valoración ao respecto da mobilización convocada pola CIG para o 19 de xuño.

Primeiro: os sindicatos asinantes hai anos que mantemos unha posición consensuada, froito dos debates conxuntos, pero en pé de igualdade, sobre a necesidade da convocatoria dunha folga xeral. No entanto concluímos que a convocatoria da CIG non reúne as condicións e as garantías necesarias para ser catalogada coma tal polo seguinte:

  • Unha folga xeral debe ser convocada por unha demanda social que loxicamente inclúa un traballo previo de contactos entre organizacións sindicais, colectivos, plataformas e movementos sociais; non poden, polo tanto, obedecer a decisións dunha parte que substraia a vontade da totalidade. Neste caso a folga deixa de seren un instrumento da clase traballadora para se converter no instrumento dunhas siglas.

Read More

 

post

A CGT CONVOCA FOLGA XERAL O 8 DE MARZO

A CGT en coordinación con organizacións do movemento feminista, quen vén expoñendo desde hai uns anos esta proposta dunha folga xeral centrada nas mulleres, tendo as mulleres un protagonismo especial na convocatoria e nas reivindicacións.

Afectará a todos os traballadores e traballadoras, de todos os ámbitos sectoriais, públicos e privados, sen distinción ningunha de situación laboral, sexo, idade ou condición social.

O obxectivo é parar a vida en toda a súa extensión e visibilizar o papel protagonista que ten a muller na engrenaxe desa vida. A folga xeral exponse como folga laboral (convocando a toda a clase traballadora); folga de coidados (que evidencie a sobrecarga e invisibilidade dos coidados, a ausencia de corresponsabilidade no traballo doméstico e de coidados, e permita a visibilidade máxima das mulleres); de consumo (ferramenta útil para loitar contra o capitalismo e potenciar a economía que poña a vida no centro), e estudantil (buscando o apoio e convocatoria dos sindicatos e organizacións estudantís). Read More

 

post

ANTES DESTRUIRON O MONTE, AGORA O QUEIMAN POLÍTICA FORESTAL Ó SERVIZO DO CAPITAL: DEVASTACIÓN AMBIENTAL

 

Agora, tal como aconteceu o ano pasado e viña sucedendo en todos os anteriores, os incendios forestais carbonizan decenas de miles de hectáreas de bosque galego. Decenas de montes están ardendo. Miles xa arderan, nos derradeiros 20 anos, a unha media de 25.000 hectáreas anuais.
Desde que o capitalismo máis voraz se fixo dono do monte galego, coincidindo coa instalación de consorcios madeireiros e taboleiros en distintos lugares de Galicia, fixéronse desaparecer do noso bosque as súas árbores propias para ser substituídos masivamente por outras especies máis “rendibles”, sobre todo eucalipto e piñeiro. Read More

 

A CGT de Galicia fai un chamamento para participar na manifestación das Marchas da Dignidade do día 27 de maio en Madrid

As Marchas da Dignidade, das que forma parte a CGT, volven a Madrid o día 27 de maio. Unha vez máis, encheremos as rúas de Madrid para manifestar o noso rexeitamento da situación actual, para reclamar a derrogación da Reforma Laboral, para pedir a liberdade de todos os condenados por protestar e o sobreseemento dos procesados e sancionados, para reclamar rendas suficientes, para esixir traballos dignos en condicións dignas, para volver berrar PAN, TRABALLO, TEITO E DIGNIDADE.

As Marchas de Galicia conseguiron negociar que haxa tren a Madrid. Está prevista a saída ás 07:50 horas da Coruña, pasando por Compostela (saída 08:20) e Ourense, de onde sairá ás 09:00 horas, con chegada ás 14:00 horas a Chamartín e volverá á noitiña, con saída de Chamartín ás 22:00 horas. Para os compañeiros de Ferrol, Lugo, Pontevedra e Vigo haberá autobuses que os achegarán ás estacións do tren.

Para que isto sexa posible é imprescindible encher os trens e hai que facelo antes do día 20. Hai que pagar todas as prazas, se ocupen ou non, polo que levar o tren medio baleiro sería inviable.

Consideramos que é unha oportunidade única para levar a Madrid os problemas dos sectores e das empresas, onde nos encontraremos con compañeir@s do resto de España, tanto da CGT como doutros movementos.

Para anotarse, están hábiles os teléfonos seguintes:

  • Zona A Coruña, Ferrol, Lugo e Compostela (Santi – 654 629 190, Ángel-696 903 890)
  • Zona Vigo (Costoya  661 402 997 )
  • Zona Pontevedra (MIguel 627791 645)

Os afiliados da CGT, nos locais do sindicato.

O DÍA 27, TOD@S A MADRID!

UNIFICANDO LOITAS!

PAN, TRABALLO, TEITO, DIGNIDADE E IGUALDADE!

 

post

A CGT, por petición de En Marea, reúnese conxuntamente co resto dos sindicatos para ser informados da súa proposta de moción de censura

En Marea anuncia a intención de levar a cabo unha moción de censura contra o executivo do Partido Popular tras os últimos acontecementos relacionados coa corrupción política e xudicial

Tras a petición de reunión de En Marea, a Confederación Xeral do Traballo de Galicia (CGT) acudiu na tarde de hoxe ao Auditorio de Galicia para ser informada da proposta de moción de censura que están a promover contra o goberno de Mariano Rajoy.

CGT agradece a deferencia e escoita con atención as explicacións que xustifican esta iniciativa política pero, á vez, pon de manifesto que a forza transformadora da sociedade está na loita da xente e non no parlamentarismo. CGT considera que non se pode abandonar a mobilización porque é a única garantía para transformar o modelo social e recuperar as conquistas que nos foron arrebatadas nos últimos anos.

Do mesmo xeito, CGT expuxo a nosas reivindicacións máis importantes nestes momentos, como a necesaria e urxente derrogación das dúas últimas reformas laborais (PSOE e PP), a derrogación das leis “mordazas”, a garantía dun Sistema Público de Pensións,  a defensa dos Servizos Públicos e do Común como dereitos esenciais das persoas, a anulación dos procesos penais e administrativos de todas as persoas represaliadas por exercer o dereito á protesta e, por suposto, a recuperación do poder adquisitivo da Clase Traballadora.

Por outra banda, é evidente e totalmente noxenta a trama de corrupción que estableceu o partido gobernante actual, polo que esperamos que a maioría social reaccione coa mobilización na rúa para botalos, o que non desculpa os episodios de corrupción de gobernos anteriores, de gobernos autonómicos e municipais igualmente noxentos e delituosos.

Calquera iniciativa que vaia na dirección de botalos non será rexeitada pola CGT, só que cremos que é a resposta da sociedade no seu conxunto, coa mobilización colectiva, a que debe ser o motor do saneamento que se pretende e que CGT entende como urxente e necesario.

A reunión transcorreu con parámetros de cordialidade e respecto mutuo.

Compostela, 02 de maio de 2017