Hoxe houbo unha reunión empresa-comité sobre as convocatorias de prazas en marcha.  

A primeira preocupación da CGT foi a publicación dos dous horarios de exame e as profesións correspondentes a cada un deles, ademais do lugar da súa realización.  

A resposta da empresa foi inaudita: ¡que o horario do exame de cada profesión o tiña que establecer os vogais do tribunal correspondente e, por tanto, había que esperar a que se reunisen! E isto a catro días laborables da data do exame!  

A CGT argumentou que o papel dos vogais era a elaboración e corrección dos exames, non a organización dos aspectos prácticos dos mesmos, que as profesións tiñan que ser agrupadas de determinada maneira (a fin de garantir que as persoas inscritas en dúas puidesen examinarse de ambas) e que os vogais nada sabían deste aspecto, e que o lóxico era que os horarios se decidisen na Comisión de Emprego entre empresa e comité.  

Non houbo maneira. A empresa non se moveu da súa postura. Pero horas máis tarde tivemos coñecemento de que a empresa enviou onte un correo a tódolos vogais indicando a que hora sería o exame de cada especialidade. Isto xa non ten nome. Ou mellor dito, si o ten: INDECENCIA.  

Hai que ter moi mala baba para, estando establecidos xa os horarios, non querer publicalos. Esta é unha proba máis de como trata Navantia ós aspirantes. Ou mellor dito, de como os MALTRATA, e o fai DE FORMA SISTEMÁTICA E DELIBERADA. Os aspirantes non se merecen isto.

Moito vídeo, moita foto en redes sociais, moito vender imaxe de cara á opinión pública, pero a auténtica cara da xefatura de RRHH de Navantia é a que demostran estes feitos: un total desprezo polos traballadores e traballadoras.  

Navantia ten que publicar os horarios e o lugar dos exames XA! 

E o PSOE e Unidas Podemos deberían empezar a preocuparse polas falcatruadas que, no seu nome, organizan uns responsables de RRHH que non desentoarían nada cun goberno do PP-Vox.  

Sección Sindical Unitaria de CGT en Navantia-Ferrol

Sección Sindical Unitaria de CGT en Navantia – Ferrol

Prazas operarios-empregados sénior

Está pendente de publicarse a lista definitiva de admitidos/as a exame.
Algunhas reclamacións aportaron un documento chamado "Relación de comunicacións da contratación laboral dun traballador", obtido en persoa nunha oficina pública de emprego e no que figura a profesión exercida. Ó ser oficiais, obviamente aceptáronse tales documentos.
Pero tamén se puxo de manifesto que Navantia non tivo en conta eses documentos á hora de elaborar as 2ª listas provisorias. A CGT entende que este erro debe ser subsanado de oficio.
Non compartimos a postura dos restantes sindicatos, que defenden que só se corrixa naqueles casos en que o afectado/a presentou reclamación.
¿Sería xusto que alguén que cumpre tódolos requisitos ficase excluído por un erro do que non ten absolutamente ningunha culpa? Na nosa opinión, NON.
Se Navantia fixo as cousas mal, terá que facelas ben. Este erro debe ser corrixido con independencia de se os afectados presentaron reclamación ou non.

Prazas de bombeiros

No portal de emprego de Navantia están publicadas dúas convocatoria de "Técnico de Emerxencia,
Seguridade e Saúde Laboral" (bombeiro). Son 3 prazas sénior (4 ou máis anos de experiencia laboral na profesión) e 5 prazas júnior (menos de 4 anos).
En ambos casos, o prazo de inscrición comezará o 30 de agosto e rematará o 10 de setembro. NON será válida ningunha inscrición realizada antes do inicio do prazo ou despois do seu remate.
As bases destas convocatorias están publicadas tanto na sección "Ofertas de emprego" como na sección "Listados e comunicacións" do portal de emprego de Navantia.
Pero as bases das prazas júnior publicadas na sección "Listados e comunicacións" están incompletas (en concreto, falta o gráfico explicativo do circuíto de velocidade). Xa se lle comunicou á empresa para que o corrixa.
Así que é recomendable mirar as bases publicadas na sección "Ofertas de emprego". Ademais, nesta sección publicouse esta semana unha nota aclaratoria ás bases, que non se publicou na sección de "Listados".

Sección Sindical Unitaria de CGT en Navantia-Ferrol