Ante a grande cantidade de informacións acerca do tráxico accidente de tren acontecido nas inmediacións de Compostela, dende a CGT queremos manifestar o seguinte:
Parécenos de todo indignante o trato que se está a dar ao traballador que conducía o tren do accidente de Compostela.
As declaracións dos Presidentes de Renfe-Operadora e ADIF sobre os motivos do accidente e culpabilizando dende o principio ao traballador evidencian o escaso coñecemento que teñen do ferrocarril e que unicamente foron postos nestas presidencias polo seu coñecemento de economía. Co fin de aforrar custos e preparar a difusión das empresas e a súa futura privatización, algo que sempre vai en detrimento da seguridade.
Cumpre lembrar que a liña entre A Coruña, Santiago e Ourense, e a de Madrid a Alicante, se inauguraron como liñas de Alta Velocidade, e así se recolle nas hemerotecas, onde están os políticos que participaron no evento e que tanto presionan para que se produzan as inauguracións, custe o que custe, para poder saír na foto.
Estas liñas non dispoñen dos sistemas de seguridade axeitados para circular como o resto de liñas AVE. Non están sinalizadas como as liñas convencionais pois se supón que os sistemas de seguridade suplen o sistema de sinalización, sempre e cando existan estes sistemas de seguridade.
Non está prohibido o uso de teléfono móbil, é máis, é unha ferramenta de seguridade da que dotan aos maquinistas, por iso nos postos de mando, gabinetes de circulación e estacións sempre se coñece qué maquinista conduce o tren e mailo seu número de teléfono corporativo.
O traballador é o último elo na cadea de seguridade e non o único, como aconteceu no tráxico accidente acontecido o día 24 de xullo.
Para a CGT hai moitas preguntas a realizar, ás que aínda ninguén deu resposta:
- Por que se inauguran como vías de Alta Velocidade cando non están acondicionadas para que así sexa?
- Por que se utilizan vehículos Talgo serie 730 nesta liña cando este tren non é compatible co sistema de seguridade ERMTS?
- Por que se pide circular sen o sistema de seguridade ERMTS ao Talgo serie 730 nesta liña e porque se lle permite?
- Por que sabendo que vai sen ERMTS non se sinaliza a vía como a convencional para que o maquinista teña toda a información?
- Por que sabendo que vai sen ERMTS non se puxo unha baliza para que actuase o ASFA Dixital?
Na CGT entendemos que hai moitas responsabilidades que dirimir no tráxico accidente de Santiago de Compostela e dende CGT estamos dispostos a actuar xuridicamente ata que así sexa.
Dende CGT cremos que a división do transporte ferroviario en Renfe-Operadora e ADIF xera malas xestións, disfuncións e baleiros que afectan gravemente á seguridade. Nunca se debería ter fraccionado a extinta empresa RENFE, para garantir a coordinación máxima e sobre todo, o máis importante, a seguridade.
Sector Ferroviario da CGT de Galicia