Onte, 9 de abril,  a empresa Atento Teleservizos decidiu unilateralmente o despido de 112 traballadores na plataforma da Coruña, pertencentes ao servizo de Atención de Empresas de Movistar.
A única xustificación que aduce a empresa e unha suposta diminución do volume de chamadas do servizo. Esta diminución é consecuencia do desvío de chamadas a outros centros de traballo, táctica que utiliza a empresa cando quere desfacerse dun número importante de traballadores.
Dende o Comité de Empresa  se considera que esta indiscriminada redución de postos de traballo só está xustificada pola avaricia da empresa para aumentar o seu beneficio. Por isto se emprenderán as accións necesarias en defensa dos postos de traballo e o cese dos abusos empresariais.

Así, o Comité de Empresa xa convocou concentracións diante da empresa na rúa de Juan Flórez 80-82, nas seguintes datas e horas:

• Do 9 ao 12 de abril,  de 12 a 13 horas e  ás 20 horas.
• Do 15 ao 19 de abril, de 12 a 13 horas e ás 19 horas.
• Do 22 ao 26 de abril, de 12 a 13 horas e ás 19 horas.

A CGT ten claro que os despidos son fraudulentos, ademáis de inxustificados, e non deixará de denunciar, en tódolos ámbitos, as prácticas abusivas de Atento e Telefónica. Coa loita, o apoio mutuo e a participación de todos os traballadores e traballadoras nas mobilizacións conseguiremos que se replanteen executar este infame despido colectivo.

Máis información: Blog da Sección Sindical da CGT en Atento na Coruña

O venres, día 5 de abril, ás 9,30 horas, a CGT convoca unha concentración diante da Oficina Principal de Correos na Coruña en contra da represión que se está a producir aos afiliados e simpatizantes do sindicato.

Os compañeiros e compañeiras da CGT en Correos na Coruña, levan moito tempo denunciando os continuos ataques que o servizo público postal está a sufrir por parte da dirección da SAE Correos. Nos últimos anos, Correos suprimiu 9.000 postos de traballo, argumentando unha suposta baixada do tráfico postal do 30 %, aínda que só foi capaz de xustificar un descenso do 7%. Pero a eliminación de postos de traballo é do 21%, claramente desproporcionada, sen ter en conta outras variables como a distancia,o número de vivendas, …

Agora, os traballadores e traballadoras postais da Coruña se atopan directamente ameazados pola perda de postos de traballo que a empresa tenta por en marcha a partir do vindeiro 15 de abril. A CGT xa ten manifestado a súa oposición a esta intención de suprimir 9 postos de traballo que afectará á UR2 de Os Mallos, denunciando tamén que esta merma se produce sen información e consulta previa aos traballadores e traballadoras. Ademais, rexeita a aplicación da mobilidade xeográfica recollida no Convenio, que levará á reubicación de dúas persoas en Arteixo. A CGT rexeitou hai xa dous anos a asinar un texto que amparaba estes ataques aos dereitos laborais, logo estendidos pola reforma laboral e o decreto 20/2012. Read More

O xoves, ás 11,30 horas, a CGT da Coruña convoca unha concentración, unitaria co resto de sindicatos, ás portas do Edificio da Xunta en Monelos, en protesta polos recortes e o desmantelamento dos servizos públicos.

Está prevista a continuación das concentracións en xoves alternos do mes de abril.

Sección Sindical da CGT na Xunta – A Coruña

A empresa do telemarketing EXTEL, do grupo ADECCO, ten dado un paso mais no encadeamento de abusos aos que ten acostumados aos seus traballadores e traballadoras no centro de traballo de que dispón na Coruña.
Desta volta, e de costas ao Comité, a empresa comunicou a mais de 150 traballadores e traballadoras do departamento de Retención Pemes un cambio de departamento que supón unha modificación sustancial das súas condicións de traballo dado que afecta ao seus horarios e rendemento no traballo, afectando á súa remuneración. Dos 150 afectados, 34 traballadores e traballadoras foron despedidos por fin de obra o domingo para o luns firmar un novo contrato.
O Comité considera que a empresa está a facer un despido colectivo e modificación das condicións de traballo, con cambios de horarios, de xeito ilegal, saltándose tódolos procedementos establecidos. A dirección da empresa leva un mes de enganos, vendendo a intención de manter xornadas, quendas e horarios, cando o que realmente facía era recolocar a dedo, sen ningún tipo de criterio obxectivo.

Por isto, a CGT e o resto de sindicatos presentes no Comité, anuncia que non vai a tolerar que esta actuación empresarial e chama a todos os traballadores e traballadoras da plataforma a secundar os paros convocados dunha hora por quenda de traballo, o vindeiro xoves, 21 de febreiro, ás 12:30 e ás 18:30.

 Sección Sindical da CGT en EXTEL na Coruña

Continúan as mobilizacións impulsadas pola Plataforma Galega en Defensa dos Servizos Públicos, na que participa a CGT e que coordina a 18 organizacións sindicais e sectoriais. Así, o vindeiro xoves, 21 de febreiro, se celebrarán de xeito simultaneo concentracións nas principais cidades galegas. Na cidade da Coruña, a concentración está convocada ás 19 horas, diante do Edificio de Facenda da Xunta de Galicia que está situado na praza de Pontevedra.

A CGT da Coruña chama á participación, non só de todos os empregados públicos, senón tamén de todos os traballadores e traballadoras para seguer a loitar na defensa duns servizos públicos de calidade para todos e todas.

CGT A Coruña 

O próximo xoves, día 17 de xaneiro, ás 19:00 horas, a Plataforma Galega en Defensa dos Servizos Públicos ten convocado unha concentración diante da Delegación do Goberno, na Praza de Ourense da Coruña.
Na Plataforma están integrada a CGT, así como o resto dos sindicatos, e o obxectivo da concentración (que pode converterse en manifestación, segundo o número de participantes) é a de protestar polo desmantelamento dos servizos públicos e as polas continuas agresións contra os dereitos dos empregados públicos.
O punto de encontro para os compañeiros da CGT é diante do quiosco da Praza de Ourense, pouco antes da concentración.
Asímesmo, os xoves días 17, 24 e 31 deste mes de xaneiro haberá concentracións, ás 11:30 horas, diante do Edificio da Xunta en Monelos, contra os recortes na Administración pública.

Actualización: A concentración convértese en Manifestación dende a Delegación do Goberno (praza de Ourense) ata a Subdelegación do Goberno (Avenida da Marina) [Editado 15-01-2013]

CGT da Coruña