Hoxe a CGT da Coruña fixo unha concentración diante da Delegación do Goberno para denunciar a represión sindical e social que se está a producir en todo o territorio español. A partir das 13:00 horas, unhas 30 persoas xuntáronse para protestar cunha pancarta alusiva. A continuación, entregaron un escrito da Delegación que dicía o seguinte:

Sr. Delegado do Goberno en Galicia
A Coruña

Queremos trasladarlle e, a través de vostede, ao Goberno que representa, o noso máis absoluto rexeitamento e indignación polas súas políticas de permanentes recortes de dereitos e liberdades á cidadanía, que están a empobrecer de xeito dramático á maioría da sociedade, xerando situacións de extrema necesidade que non estamos dispostos a consentir.

O incremento da represión policial e xudicial que están vostedes levando a cabo contra as persoas máis coherentes e activas da clase traballadora e dos movementos sociais, supón que no 2014 haxa máis de corenta procesos penais abertos contra manifestantes e folguistas, aos que se lles pide dende as fiscalías máis de cento corenta anos de cárcere e infinidade de multas económicas inasumibles, todo iso sen probar a súa implicación nin culpabilidade.

Estamos ante unha escalada da represión arbitraria, aleatoria, indiscriminada, inxustificada e xeneralizada por todos os cantos do estado español. Unha represión que se exerce dende a máis absoluta impunidade, que recorre a vellas técnicas de réximes políticos autoritarios e fascistas, con policías encapuchados entre os manifestantes que exercen de provocadores e cuxo único fin é amedrentar a poboación e amordazala para rematar coa disidencia, a discrepancia e a protesta sindical e social.

Isto acontece nunha paisaxe enchida de corrupción empresarial, institucional e política cuxa persecución e condenas non gardan ningunha proporcionalidade coas que se exercen contra persoas inocentes que o único que fan é exercer o seu dereito á protesta, de forma pacífica.

Son moitos miles de persoas as que están a ser identificadas, reprimidas, represaliadas, castigadas, procesadas, multadas, vexadas, extorsionadas, encarceradas e maltratadas…. dende que comezou a resposta sindical e social a esta crise-estafa, dende as Folgas Xerais pasadas, ata as Marchas do 22 M e todas as Concentracións e Manifestacións que lexitimamente se fóron realizando.

A gravidade da represión que exerce o goberno ao que vostede representa non está a pasar desapercibida para o resto de Europa, para as Nacións Unidas, nin tampouco para organizacións como Amnistía Internacional, que enviaron informes que poñen de manifesto que no estado español se están a acernar dereitos e liberdades democráticas como o de liberdade de expresión e de reunión, de manifestación, de folga, etc…

Este goberno, dun réxime que se está a esborrallar, corrompido, desacreditado, inxusto, elitista, afastado da realidade, desautorizado pola maioría social, está a recorrer á violencia e á represión para escravizarnos, para defenderse dun pobo que reclama os seus dereitos.

Esta e outras organizacións non estamos dispostos a calar, a permanecer de brazos cruzados mentres nos despiden, róubannos, estáfannos, desafiúzannos, déixannos na indixencia, sen servizos públicos nin liberdades. Somos moitos xa os que estamos a defender a xustiza social, a democracia directa, o apoio mutuo, a liberdade con maiúsculas.

Non descansaremos ata conseguir a liberación, o sobresemento, a absolución, a excarceración, etc.. de todas as nosas compañeiras e compañeiros inxustamente represaliados.

Traslade esta mensaxe a quen corresponda. Nós farémosllo chegar dende a rúa, porque a loita é o único camiño que nos deixan.

A Coruña, 30 de setembro de 2014

Comité Local da CGT da Coruña

Comparte esta noticia...
Share on Facebook
Facebook
Tweet about this on Twitter
Twitter
Share on LinkedIn
Linkedin
Print this page
Print
Email this to someone
email